EN POEMES

Replik

Gen lontan
libète kanpe lwen nou
Vyolans Kwazele n
M aprann se pa tout rèv fanm ki sosyab

M aprann
Fanm pa vwa divinò
Laj pa ban n rezon sou swaf nou
Se bras gason ki bay lavni wotè

Gen lontan
Nou pa nan enterè sosyete 
Domaj
Libète pa atrapan
Dwadelòm kenbe n nan de pwent
An mòd pote m sekou

Granmesi fanm ki te janbe n
Maladrès listwa
Ki te ede n rele tribilasyon nou
Granmesi fanm ki te debride n ak vyeyès tradisyon

Depi mas pwente
Lavi ban n bon jan
Fanm tounen liy editoryal tout powèm
Tout sikatris sou do n pouse flè

Poutan diskriminasyon chèf kanbiz
fènwa kwè pou l selèb
Fòk limyè bay etensèl li do
Fòk silans nou bwè pwa
Alòske
Manti pa gen pasyans
Souvni nou jwe di

Kilè n ap konprann
Dwa moun fratènèl
Se menm risk yo ki dòlote n
Nou drive menm batman 

Kilè n ap konprann fanm ak gason 
Se elikibib patisyon ki akòde melodi tan an
Fwontyè ki separe n
Se lanmò ak lavi
Nou pyete jou yo ak menm rit feblès

Kilè n ap konprann
Chans yo franchi n menm jan
Tout powèm gen fòm flè

Jessica Nazaire

Related Articles

Leave a Reply

Your email address will not be published. Required fields are marked *

Check Also
Close
Back to top button