Dèyè souri m make chagren
Pawòl pap janm ka eksprime
M ap chante pandan nanm mwen ap kriye
Anmwey! Sekou ! pou yon kè ki bouke soufri
Ki vle ale lwen, lwen mechanste mond lan
Kò m febli,
Li bouke kenbe anndan m k ap kouri
K ap chache repo, etènèl petèt….
Je m pa konn ki kote pou l founi gade,
Pou l sispann wè doulè, chirepit ak latwoublay
Zòrèy mwen pa vle tande, kri kap soti nan zantray latè
Pye m refize touche tè, pile rigòl san kap pote ale rèv ak inosans
Tèt mwen pati,
rès kòm ap fè laviwonn dede, ki pap janm mennen nan wout li
Zantray mwen al tann
Jwa m ale ak li, m ap gade yo kap defile chak jou,
Ki prale lwen, pi lwen pou yo dekouraje tounen
Mwen kontinye depann de souf mwen,
Ki kenbe m nan lavi,
Legzistans mwen anmè kou fyèl, okenn siwo paka ba l gou
Nou se yon souf…
Taina Camy
