Absans ou se yon frèt kach
Pou filange lespri
Absans ou file debò,
Absans ou se yon powèm
M ekri ak dlo je
Ou kuit kè m nan chodyè soufrans
Absans ou se yon pwa kongo sèch ki refize kreve
Yon mizik san son
Absans ou se yon kalòt marasa lanmou pran
Pou koupe somèy miyèt moso
Absans ou se yon te asowosi
Yon chwal k ap galope san rete
Absans ou lou k on pwa senkant
Cheri rele m
Rele m lè lanjelis tanmen
Rele m lè douvanjou kale
Rele m toutan
Rele m tout lè
Rele m sou tèt mòn
Rele m nan plenn
Rele m anba dlo
Zòrèy mwen pwograme
Nenpòt peyi w ye, depi w rele m
M ap tande
M sonje lanjelis
K ap Gade m k ap dòmi nan bra w
M anvi lavi m kanpe
Ekri w se kriye ak vwa m tou ba
W ale ou kite anprent ou ankè nan kè m
Kè m di m pran kè
Tann ou tounen
Mackenda DELIASSE